Qaraqalpaq tili klaviatura maketin "WINDOWS" platformasında paydalanıw
Bul maketler Windows operacion sistemalarına mólsherlengen bolıp, yunikod simvollardı kórsete alatuǵın hár qanday programmada isleydi.
Maketlerde qaraqalpaq tiline tiyisli bolǵan háripler járdemshi klavishalar arqalı teriledi. Nátiyjede, klavituradaǵı hesh qanday hárip joǵalmaydı: yaǵnıy qaraqalpaq kirill maketinde “otırıp” biymálel rus tilinde, al qaraqalpaq latın maketinde “otırıp” biymálel inglis tilinde jaza beriwge boladı.
Járdemshi klavishalar qaysılar?
Qolaylıqtı asırıw maqsetinde birdey wazıypanı atqarıwshı, teń kúshke iye bolǵan eki járdemshi klavishalar isletilgen. Bular, klaviaturanıń shep-joqarı bólegindegi “'”, “~” hám “Ё” simvolları jaylasqan klavisha hámde klaviaturanıń oń-joqarı bólegindegi “\”, “|” hám “/” simvolları jaylasqan klavishalar.
Tómendegi súwrette sol járdemshi klavishalar kórsetilgen:
Bundaǵı jáne bir qolaylıq, Word-qa usaǵan programmalarda kerekli háriplerdi Ctrl hám Alt klavishalarına baylanıstıraman dep, sol klavishalardıń óz wazıypaların joytıp qoymaysız. Máselen, Ctrl + F klavishalar kombinaciyası “Á” háribine isletilmesten, óziniń “izlep tabıw” wazıypasın atqaradı.
Qaraqalpaqsha háripler qalay teriledi?
Qaraqalpaqsha háriplerdi teriw ushın dáslep járdemshi klavishalardıń birewi basıp-jiberiledi (basıp turılmaydı). Keyninen, kerekli “tiykarǵı” klavisha basıladı.
Máselen, “á” háribin teriw ushın, járdemshi klavishalardıń birewi basıp-jiberilgennen keyin, “a” klavishası basıladı.
Qaraqalpaqsha kirill háriplerin teriw ushın qollanılatuǵın “tiykarǵı” háripler:
Qaraqalpaqsha hárip | Tiykarǵı hárip |
|---|---|
| Ә | А |
| ә | а |
| Ғ | Г |
| ғ | г |
| Қ | К |
| қ | к |
| Ң | Н |
| ң | н |
| Ө | О |
| ө | о |
| Ү | И |
| ү | и |
| Ў | У |
| ў | у |
| Ҳ | Х |
| ҳ | х |
Qaraqalpaqsha latın háriplerin teriw ushın qollanılatuǵın “tiykarǵı” háripler:
Qaraqalpaqsha hárip | Tiykarǵı hárip |
|---|---|
| Á | A |
| á | a |
| Ǵ | G |
| ǵ | g |
| Ń | N |
| ń | n |
| Ó | O |
| ó | o |
| Ú | U |
| ú | u |
| Í | I |
| ı | i |
Járdemshi klavishalardıń háripleri qalay teriledi?
Járdemshi klavishalardıń ózleriniń háriplerin teriw ushın, sol járdemshi klavisha basıp-jiberilgennen keyin, “boslıq” - (Probel) klavishası basıladı.
Hámde, járdemshi klavishalar tek qaraqalpaqsha háriplerge tásir etedi. Yaǵnıy, járdemshi klavishadan keyin qaraqalpaqsha emes háripti terseńiz, járdemshi klavishalardıń ózleriniń simvolları terile beredi.
Bul materialdıń original avtorı: jiemurat, hám bul saytta ol azǵana ózgertildi.